Македонски: Опит кој прикажува електризација на електроскоп со електростатска индукција (инфлуенца). Во првиот обид електроскопот се допира со наелектризирана прачка и тој се електризира постојано, односно откако ќе се оддалечи прачката електроскопот останува наелектризиран. Но, ако прачката само се приближи до електроскопот (НЕМА ДОПИР), ливчињата на електроскопот повторно покажуваат отклон. Ако се оддалечи прачката ливчињата покажуваат нула, односно електроскопот не е наелектризиран. Оваа појава се вика електростатска инфлуенца (индукција). Може да се заклучи дек при електростатска инфлуенца телата се електризираат привремено, само додека се под дејство на наелектризираното тело, затоа што под дејство на наелектризираното тело доаѓа до прерасрпеделба на полнежите во металот. За да дојде до овој ефект, електричните полнежи (во овој случај електроните во металот) се прераспределуваат. Тоа значи дека ако се приближи ебонитната прачка, која е наелектризирана негативно, електроните од главата на електроскопот ќе бидат одбиени и ќе се натрупаат во ливчињата. Така, главата е позитивно наелектризирана, а ливчињата негативно. При оддалечување на прачката електроните се враќаат назад и електроскопот повторно е ненаелектрииран. Слично е и со стаклената прачка, но таа е позитивно наелектризирана, па електроните се привлечени и со тоа се концентрираат во главата на електроскопот. Така, таа е негативно наелектризирана, а ливчињата позитивно. Ако прачката е во близина на електроскопот и експериментаторот ја допре неговата главата, тогаш прераспределбата се врши помеѓу електроскопот и телото на експериментаторот. Ако е ебонитна прачка (негативна), електроните од електроскопот ќе бидат одбиени тие ќе отидат во телото на експериментаторот. Така, сега електроскопот е позитивен, а телото на експериментаторот е негативно. Ако телата се одвојат додека прачката е во близина, тие две тела остануваат постојано наелектризирани. Подготовка, изведба и објаснување: проф. Оливер Зајков. Институт за физика на Природно-математичкиот факултет во Скопје.